Jaque III de Majorco

+

25 an, chivalié, cousin de la Rèino Jano, cinq an de mens
Marida à Damo Eleno. Un drole : Jaume lou Jouine
Amant de la Rèino Jano que i’avié escri gaire avans sa mort uno letro de separacioun car supourtavo plus d’engana sa mouié.
Persouno leialo, respetablo e ambiciouso mai vioulènto e crudèlo de cop que i’a !
Avié decida de s’apoudera l’Espaso Flourido de Sant-Veran pèr “faire sa lèi”.

Li gardo

Lou Rèi Louis de Tarento

La Rèino Jano

La fado Melusino

Tavèn la masco

Nostradamus

Lou Dau di mountagno

Entre-signe 1

Lou 21 d’abriéu

RAPORT D’AUTOUPSÌO

« La counfederacioun di medecin dóu Castèu de Buous declaro que Jaque III de Majorco es mort quàuqui tèms après li douge cop de miejo-niue, lou cors trenca pèr uno grando e pesanto espaso.

Lou sujèt es esta retrouba aqueste matin dóu 21 d’abriéu. Au moumen de nosto intervencioun, se troubavo au sòu proche de la fourèst, sus la colo dóu Mourre-Negre. Èro alounja e sis iue noun barra, regardavon tout de dre vers lou cèu, dins nosto direicioun ; èro pas bèu de vèire acò. Pèr faire aquelo autoupsìo, avèn prouceda segound la metodo tradiciounalo. Après un eisamen penible, avèn counclu qu’es segur qu’es un assassinat dins un duèl à l’espaso.

Resumit :
10:34 Toco-toco emé lou sujèt.
10:37 Lou sujèt es sus la taulo de disseicioun e lèst pèr l’intervencioun.
10:38 Debuto de l’intervencioun cirourgicalo.
Materiau utilisa :

1. Escalpèu
2. Martèu.
3. Resseto di metau
4. Escoudo pnéumatico
5. Cisèu
6. Coumpresso

10:46 Duberturo dóu ventre qu’a 6 trau au mitan. Aqui dedins, n’i’a tóuti lis ourgane, li bouièu soun encaro rampli de mangiho mita digerido. Dounc segur que lou sujèt es mort vers miejo-niue. Tambèn fau dire que i’a ges de pouisoun, soulamen d’óulivo, d’ensalado, de tartifle, de froumage e de vin rouge de la Crous de Pin.
11:17 Eisamen dóu groupe neurò-courticò-cervicò-cerebrau. Rèn d’anourmau.
11:25 Fin de l’obro, anen manja un moussèu.

Ansin, lou paure ome es mort vers miejo-niue, à la seguido de tres cop d’espaso, e a gaire agu lou tèms de soufri, la mort es vengudo bèn lèu.

Certifian verai aquéu raport. »

Li medecin dóu Castèu de Buous.

Entre-signe 2 : Counvoucacioun au duèl

Lou dimars 19 d’abriéu,

Louis de Tarento,

T’espère deman sus la colo dóu Mourre-Negre au moumen ounte lou darrié raioun dóu soulèu aura fini de lusi e que lou gau sara alassa de canta.

Vènes emé toun Espaso Flourido de Sant-Veran e suplico lou bon Diéu que soun poudé t’ajudara pèr vèire encaro lou jour se leva…

Lou tèms ounte fasiés ta lèi es acaba ! Es pas uno lucho de parlage, es un duèl vertadié que te mande.

Jaque III de Majorco,
Que pòu plus endura d’èstre dins toun oumbro.

Entre-signe 3 : "Letro de separacioun "

Jano,

Ié sian, nous sara plus poussible de nous vèire. Après tant d’annado ensèn e tant de causo partejado, ai lou triste devé de te dire que tout s’acabo vuei…

Pode plus supourta de troumpa ma femo Eleno ; leissen à chascun lou tèms de pensa à-n-un aveni.

Adiéu ma Jano, que Diéu te garde en pas…

Toun Jaque que saup plus ço que fau faire...

Entre-signe 4 : "Rendu-comte d'un gardian dóu Castèu de Buous "

RENDU-COMTE

Dato : L’an de gràci 1356, lou 21 d’Abriéu
Ouro : 4 ouro e miejo de l’après-miejour
Liò : Castèu de Buous

« Aquesto niue, ère davans la porto de la chambro pèr coucha dóu Rèi Louis de Tarento e de la Rèino Jano. Pode afourti qu’ai bèn garda lou dintre touto la vesprado e meme lou matin, e que lis ai pas vist sourti de sa chambro. 
En mai d’acò, fau saupre que la chambro dóu celèbre Nostradamus èro just en fàci, que poudiéu tambèn la teni d’à-mènt. Dounc pode afourti qu’es pas éu nimai.
Pode meme vous dire qu’an tóuti tres rounca touto la niue que riscave pas de m’endourmi ! »

        « Pèr lou mistèri de l’Espaso Flourido de Sant-Veran, fau saupre que soun prouprietàri èro lou Dau de la mountagno. Lou Dau que l’a dounado aro au rèi Louis de Tarento quàuqui tèms avans. Èro belèu pèr ié paga uno rèndo, lou dre de viéure sus si terro. Mai aquelo espaso es estado retroubado au castèu de Buous dins soun estu. E soun fourrèu èro clavela ; siéu soulet d’agué la clau… Poudès èstre segur de ma bono fès qu’ai jura à Diéu la vido de mis enfant s’un jour dise uno messorgo. S’agis dounc de-segur de magìo ! »

Frederi de la Bigouneto,
gardian-majour dóu Castèu de Buous.