JAN DE L'OURSE

Es l’istòri d’uno chato, Oursano, que rèsto touto souleto…

Pèr viéure, recampo de frucho, de flour, de berigoulo dins la fourèst, e li vènd pièi dins soun vilage.

Mai un jour, Oursano pauso soun pèd sus l’erbo que desvarìo e se pèrd…

Trobo uno croto, e vòu dourmi un pau…

Mai i’a un gros ourse que ié demando quau es.

Fin finalo, ié dis que pòu resta viéure em’éu.

Un an après, lou 24 de jun, Oursano e l’ourse an un pichot. Ié dison Jan.

A 12 an, Jan garço un cop de tèsto à soun paire qu’es furious.

Alor, s’en vai emé sa maire. S’entornon au vilage…

A l’escolo dóu vilage li coulègo de Jan se garço de sa taio de gigant e de si péu que i’atapon d’en plen soun cors…

Ié meton pèr escais-noum « Jan de l’Ourse ».

Un jour, Jan, que n’a soun gounfle, pico sus si coulègo e lis ensuco. Lou mèstre d’escolo, enmalicia, sono li gendarmo que lou bouton en gabiolo.

Mai Jan s’escapo de la presoun, e decido de grata camin pèr vèire lou mounde.

Rescontro un fabre que lou fai travaia… Mai Jan a trop de forço e esclapo tout.

Alor, emé tout lou ferre qu’a degaia, se fargo uno fusto de ferre gigantasso e countùnio soun camin.

Se capito pièi emé de Deferre Moulin, que mando de pèiro de moulin pèr s’amusa… Decidon de parti ensèn.

En camin, toumbon sus Esclapo-Roure que copo d’aubre em’un pichot serpeto.

Éu tambèn vòu viéure uno aventuro emé Jan de l’ourse e Deferre Moulin…

Tóuti tres deviston un grand castèu.

Uno vièio ié dis de pas i’ana, d’abord que de centenau de chivalié se n’en soun jamai entourna…

Mai, i’a degun dins lou castèu e decidon de lou faire siéu.

Lou proumié jour, Deferre Moulin se groupo à faire la soupo, dóu tèms que lis àutri van cassa.

Subran, un pichot nanet que douno d’èr à-n-un cat, gisclo de la chaminèio e demando à Deferre Moulin de ié faire tasta sa soupo.

Coume dis de noun, lou pichot nanet l’escagasso em’uno verdigano.

Lendeman, vèn à Esclapo-Roure d’alesti la biasso… Mai tournamai, lou pichot nanet l’ensuco.

Lou tresen jour, Jan de l’ourse, qu’es davans soun oulo, espóutis lou nanet.

Lou paure nanet crido lèu cebo e fai l’escoumesso de desvela lou secrèt dóu castèu.

Vaqui lou secrèt : « Souto la pèiro de la chaminèio, i’a un cros, e au founs d’aquéu cros, i’a’no princesso empresounado ». Jan de l’ourse fai davala Deferre Moulin e Esclapo-Roure dins lou pous, mai siegue la cordo es trop courto, siegue an trop pòu.

Jan de l’ourse davalo à soun tour e vèi un lebrié blanc escrincela dins la pèiro que gardo un moulounas d’os e d’armuro esclapado.

Travesso pièi un riéu, se bat’mé de dragoun e, aguènt coupa la coua d’un, aquesto d’aqui l’adus fin qu’à-n-uno fenèstro que se n’escapo uno voues di mai cantadisso.

Jan de l’ourse capito de rintra dins l’oustau de la princesso e toumbo sus un cat gros coume un chivau. L’ensuco emé la verdigano dóu nanet que l’avié recampado.

La princesso sort de soun oustau, se jito dins li bras de Jan de l’ourse : aqueste s’esvalis de bonur souto si poutoun.
Demando à si coulègo de remounta la princesso emé la cordo, mai un cop fa, aquéli capounas laisson Jan de l’ourse dins lou trau.

Dóumaci l’ajudo dóu lebrié e de la coua de dragoun, Jan de l’ourse pòu voula e se n’en sourti.

Arribo tout bèu just pèr faire cabussa lou maridage de la princesso emé Esclapo-Roure e Deferre Moulin.

Maugrat la póusso e lou sang sus sa caro, la princesso recounèis en Jan de l’ourse soun vertadié Sauvaire.

Decido de se marida em’éu.

Cri-cra, lou conte es acaba.

[Remounta / Remonter]

<< Pajo d'avans / Page précédente

[Retour à l'acuei / Retour à l'Accueil]

© Dessins réalisés par li pichot du stage PLV 2005 à Buoux.
© PLV.